Ниедно средно училиште во Штип не ги пополни слободните места во првиот упис

Додека деновиве се средуваат уписните пријави во сите средношколски центри во Штип, за образовните власти е разочарувачки податокот дека ниту најатрактивното, Медицинско училиште не успеа да ги пополни слободните места. Всушност, во првиот уписен рок за 719 слободни места аплицираа само 488 ученици. Слободни места има и за угостителската струка, што редовно беше една од најбараните, како и за информатички техничар.

Како што информираа од Општина Штип, од секторот за образование, во медицинското СОУ Јане Сандански целосно пополнети се струките за забен техничар и новата – техничар за козметичка нега и убавина. Од остранатите струки, има шест слободни места за физијатриски техничар, 2 за медицинска сестра и 5 за фармацевтски техничар. Заедно со овие слободни места, во останатите средношколски центри – гимназијата Славчо Стојменски, техничкото СОУ Коле Нехтенин и текстилното СОУ Димитар Мирасчиев има уште 231 слободно место.

„Последните години е практика да останувуаат слободни места по првиот и вториот уписен рок. Очекуваме до почетокот на новата учебна година да се пополнат поголемиот дел од слободните места“, ни изјави Снежана Санева од Општина Штип.

Во тек е вториот уписен рок, додека на 21 август ќе следи и трета шанса за тие што нема да се запишат во прва година. Факт е дека од година во година завршуваат сѐ помалку основци, што се должи и на иселувањето, но и на помалиот природен прираст на населението. 

Оваа година има и една новина со реорганизацијата на средношколските центри во Штип, со тоа што и СОУ Коле Нехтенин се очекува да прерасне во Регионален центар за стручно образование и обука под надлежност на државата.

„Следува дефинирање на струките што тука ќе се нудат за кадар кој е недоволен во моментов за потребите на индустријата во регионот. Ќе работиме на поврзување на ова училиште со бизнис заедницата и ќе направиме крупни инфраструктурни инвестиции за модернизација на условите за настава, за што се надевам дека ќе добиеме финансиска поддршка од Европска Унија, како што добивме и за претходно формираните регионални центри“, рече министерката за образование и наука, Весна Јаневска, при посетата на ова училиште во ноември минатата година.

Со новата реорганизација на стручните училишта, предвидено е во секој од планските региони да има по еден ваков центар. Засега нема најави дали штипското училиште ќе има ваква реорганизација со почетокот на новата учебна година во септември.  

Р. Л.

Сподели

Facebook
Twitter
Pinterest
LinkedIn

УПАТСТВО ЗА ПРИСТАП ДО АУДИО ЧИТАЧ НА ВЕБ ПРЕЛИСТУВАЧОТ MICROSOFT EDGE