Денеска беа потпишани договорите за спроведување на проектите од Регионалната програма ReLOaD3, каде две општини од петте селектирани општини се од Источниот регион – Штип и Берово. Програмата има за цел да ја зајакне демократијата на локално ниво преку подобрување на соработката меѓу локалните власти и граѓанското општество и преку зголемување на учеството на граѓаните во процесите на донесување одлуки. Исто така, активностите се насочени кон засилување на граѓанското учество, а ќе поддржи спроведување на граѓански иницијативи и ќе придонесе за развој на локалните заедници во избраните пет општини.
Покрај Штип и Берово, во третата фаза на Програмата ReLOaD се и општините Кавадарци, Центар и Аеродром.
Како што најавуваат од УНДП, избраните општини ќе добијат финансиска и експертска советодавна поддршка за зајакнување на партнерствата со организациите на граѓанското општество (ГО).
„ReLOaD3 ќе промовира транспарентност во финансирањето на проектите на ГО од локалните буџети и ќе придонесе за поголемо вклучување на граѓаните во донесувањето одлуки за подобрување на квалитетот на јавните услуги на локално ниво“, соопштија од УНДП.
Регионалната програма за локална демократија во Западен Балкан 3 (ReLOaD3) е продолжение на иницијативите поддржани од Проект за зајакнување на локалната демократија, финансиран од Европска Унија и имплементиран од Програмата за развој на Обединетите нации (УНДП). ReLOaD3 се спроведува во Македонија, Албанија, Црна Гора, Босна и Херцеговина, Косово и Србија.
Р. Л.


