„Делата што нè движат напред“ – Mотивациски форум во Кочани со шест инспиративни приказни за позитивни промени

Кочани се подготвува за голем настан што има за цел да ја обедини заедницата преку примери на солидарност и граѓански активизам.

На 28 март, со почеток во 19 часот, во Центарот за култура „Бели мугри“, ќе се одржи Мотивациски форум под мотото „Делата што нè движат напред“.

На форумот ќе се претстават шест говорници што со својот личен труд и упорност создаваат видливи промени во општеството. Списокот на учесници ги вклучува новинарот Александар Видиновски, Андреј Рајатоски од Gradinarot.mk, Борче Стаменов од иницијативата „Донирај компјутер“, Гордана Софија од „Генералка викенд“, Кристијан Калинов од „Ретвитни оброк“ и Весна Станковска од здружението „Љубезност“.

Секој од говорниците ќе има излагање од 10 до 15 минути, споделувајќи искуства што покажуваат дека делата на поединецот можат да поттикнат сериозни општествени поместувања.

Главниот фокус на форумот е истакнување вистински животни примери и поттикнување на граѓанскиот активизам, особено кај младите. Настанот е замислен како место каде што „делата стануваат погласни од зборовите“, промовирајќи култура на солидарност и одговорност. Организаторите нагласуваат дека форумот е неполитички, некомерцијален и отворен за сите граѓани.

Зад настанот стои „Академија Кочани“, граѓанска иницијатива што произлезе од неколку успешно реализирани волонтерски активности во 2025 година, како што се Паб-Квиз Кочани и бесплатните часови по таи чи.

Иницијативата е водена од ентузијасти чија примарна цел е општествена добробит преку збогатување на културната и едукативната понуда во градот, при што сите активности се организираат без финансиски надоместоци за организаторите.

Т. А.

Фото: „Академија Кочани“ / Илустративна фотографија

Сподели

Facebook
Twitter
Pinterest
LinkedIn

УПАТСТВО ЗА ПРИСТАП ДО АУДИО ЧИТАЧ НА ВЕБ ПРЕЛИСТУВАЧОТ MICROSOFT EDGE