На денешната седница на Советот на општина Штип беше донесена одлука за распишување на јавна набавка на закупувач на просторот од Општинскиот мултимедијален центар „Киро Глигоров“, каде и до сега работи кино-сала.
Со набавката ќе се бара оператор за наредните пет години, со тоа што основен услов е да се набави опрема за 3D техниката. Како што објасни Вишна Шорова – Ангелова, услов е набавката на опрема, но и столчиња и 3D очила, со кои ќе може да се доживее третата димензија на филмот.
„Операторот треба да набави 3D кино-прикажувач, соодветен проектор со година на производство од 2025-та, додатоци, платно од 40 метри соодветни кино столчиња и 3D очила. Доколку набавката ја добие досегашниот оператор, не го обврзуваме да набави столчиња, бидејќи веќе вложи во оваа инфраструктура во 2022 година, кога прв пат беше потпишан договорот“, рече Шорова – Ангелова.
Почетната цена на наддавањето е 105.712 денари месечно.
Во Штип веќе три години работи киното Киноверзум, меѓутоа, киноприкажувањето е во 2D техника. Отворање на кино во Штип со години беше во врвот на приоритетите, особено на младите.
Кино салата има капацитет од 142 седишта, а за потребите на киноприкажувачката дејност, некогашната голема сала на Општинскиот центар, беше преадаптирана со поставување на платно, проектор и столчиња.
В.К.


